Փամբակ համայնքը՝ COP17 կենսաբազմազանության համաշխարհային համաժողովում
· Փամբակ
COP17 կենսաբազմազանության համաժողովի «Կանաչ գոտում» Փամբակ համայնքը հանդես է եկել Լոռու մարզի միասնական տաղավարում՝ յուրօրինակ ու բովանդակալից ներկայացվածությամբ:
Վառ պաստառների, բուկլետների, լուսանկարների և տեսանյութերի միջոցով միջազգային հանրությանն են ներկայացվել համայնքի բնական հարստությունները՝ ջրային ռեսուրսները, հարուստ բուսականությունը, անտառային ֆոնդն ու կենդանական աշխարհը:
Առանձնահատուկ անդրադարձ է կատարվել այն ծրագրերին, որոնք նպաստում են էկոհամակարգերի վերականգնմանն ու կայուն զարգացմանը, այդ թվույմ՝
Լեռնաջուրում հիմնված նոր անտառաշերտերին,
Մարգահովիտում իրականացված անտառվերականգնման ծրագրերին,
Բազումի ագրոանտառին և կենսաբազմազանության պահպանմանն ուղղված համայնքային մյուս նախաձեռնություններին:
Տաղավարում առանձնակի հետաքրքրություն են շարժել Փամբակի էկոլոգիապես մաքուր արտադրանքը՝ օրգանական մեղրը, տեղական խոտաբույսերն ու բուժիչ թեյերը, ինչպես նաև էկոգյուղատնտեսության զարգացման հեռանկարները:
Կարևոր ձեռքբերում համայնքի համար
Համաժողովի շրջանակում Փամբակ համայնքի ղեկավար Սուրեն Կոստանդյանի և «Soluton» կազմակերպության միջև ստորագրվել է համագործակցության հուշագիր:
Այն միտված է Մարգահովիտ բնակավայրում կենսաբազմազանության պահպանման, էկոհամակարգերի զարգացման և բնահեն (էկո) զբոսաշրջության խթանման նոր ծրագրերի իրականացմանը:
